ភ្នំពេញ៖ ឯកអគ្គរដ្ឋទូតអាមេរិកប្រចាំកម្ពុជា លោក Partrick Murphy បានប្រកាសអំណោយថ្មីមួយរបស់រដ្ឋាភិបាលសហរដ្ឋអាមេរិកតាមរយៈមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ ដែលមានទឹកប្រាក់ចំនួន ៣៦០ ៨០០ដុល្លារសម្រាប់ជួសជុលប្រាសាទព្រះវិហារ។

ថ្លែងក្នុងពិធីប្រគល់និងទទួលវត្ថុបុរាណដែលបានលួចចេញ ២៧ដុំត្រលប់មកកម្ពុជាវិញនៅសារមន្ទីរជាតិកម្ពុជានាថ្ងៃពុធ ទី១៣ ខែកក្កដា នេះលោក Murphy បានឱ្យដឹងថាអំណោយជាង ៣៦ម៉ឺនដុល្លារនេះ ជាអំណោយបន្ថែមលើថវិការចំនួន ៤០៦ ០០០ដុល្លារអាមេរិក ដែលត្រូវបានផ្ដល់រួចហើយដោយរដ្ឋាភិបាលអាមេរិក សម្រាប់អភិរក្សាប្រាសាទប្រវត្តិសាស្ត្រនេះ ដែលស្ថិតនៅភាគខាងជើងនៃប្រទេសកម្ពុជា។

ប្រាសាទព្រះវិហារគឺជាប្រាសាទហិណ្ឌូបុរាណមួយដែលត្រូវបានសាងសង់ឡើងកំឡុងសម័យអាណាចក្រខ្មែរដែលស្ថិតនៅលើកំពូលភ្នំដែលមានកំពស់ ៥២៥ម៉ែត្រ នៅជួរភ្នំដងរ៉ែកខេត្តព្រះវិហារប្រទេសកម្ពុជា។ ប្រាសាទព្រះវិហារត្រូវបានចុះបញ្ជីជាសម្បត្តិបេតិកភណ្ឌពិភពលោកដោយយូណេស្កូនៅថ្ងៃទី៧ ខែកក្កដា ឆ្នាំ២០០៨។

ក្នុងការប្រយុទ្ធគ្នារវាងកងទ័ពខ្មែរ និងថៃ ដណ្ដើមប្រាសាទព្រះវិហារក្នុងឆ្នាំ២០១១ ប្រាសាទព្រះវិហារត្រូវបានរងការខូចខាតជាដំណំដោយសារការបាញ់គ្រាប់ផ្លោងរបស់ទាហានថៃមកលើតំបន់ប្រាសាទ៕